Hövzə Xəbər Agentliyinin verdiyi məlumata görə, Bəhreyn İnsan Hüquqları Cəmiyyətinin informasiya şöbəsinin rəhbəri Baqir Dərviş Qum şəhərində yerləşən Parsia otelində keçirilən mətbuat konfransında çıxış edərək bildirib ki, Bəhreyn rejimi müxtəlif səviyyələrdə şiələrə qarşı insan hüquqları pozuntuları törədir və bu siyasət davam edir.
O qeyd edib ki, 2011-ci ildən bu günə qədər Bəhreyndə 20 mindən çox insan, əsasən şiələr, yalnız fikir bildirdiklərinə və söz azadlığından istifadə etdiklərinə görə həbs edilib. Onun sözlərinə görə, bu şəxslər arasında bəzi sünni ictimai fiqurlar da olub. Həmçinin minlərlə insan işgəncələrə məruz qalıb və yüzlərlə şəxsə uzunmüddətli həbs cəzaları verilib.
Bəhreyn hakimiyyəti söz azadlığına imkan vermir
Baqir Dərviş vurğulayıb ki, Bəhreyn hakimiyyəti hətta adi vətəndaşları belə sərt şəkildə cəzalandırır. Onun sözlərinə görə, bəzi şəxslər Seyid Əli Xameneinin vəfatı münasibətilə başsağlığı mesajı paylaşdıqları və ya qara bayraq asdıqları üçün saxlanılıb, həbs olunub və təzyiqlərə məruz qalıblar. O bildirib ki, bu insanlar yalnız öz fikirlərini ifadə etdiklərinə görə cəzalandırılıblar.
Baqir Dərviş əlavə edib ki, bu hakimiyyət heç kimə söz azadlığı vermir və ən kiçik tənqid belə, hətta sosial şəbəkədə yazılan bir paylaşım həbs və işgəncə ilə nəticələnə bilər. Onun sözlərinə görə, yüzlərlə məhbus işgəncələr nəticəsində həyatını itirib.
İrana qarşı müharibə beynəlxalq hüququn açıq pozuntusudur
Bu siyasi fəal İran İslam Respublikasına qarşı müharibəyə də toxunaraq bildirib ki, mülki şəxslərin, o cümlədən uşaqların hədəf alınması, yaşayış evləri, tibb müəssisələri və mədəni obyektlər kimi qeyri-hərbi infrastrukturların dağıdılması Cenevrə Konvensiyalarının kobud şəkildə pozulmasıdır və beynəlxalq hərbi cinayətlər kateqoriyasına daxildir. O, Minab şəhərinin tam orta məktəbinə edilən hücumu nümunə göstərərək bildirib ki, bu hadisə nəticəsində yüzdən çox məktəbli həlak olub.
O həmçinin əlavə edib ki, ABŞ Hərbi Dəniz Qüvvələrinin Beşinci Donanmasının Bəhreyndə yerləşməsi qanunsuz xarakter daşıyır və bu, ictimaiyyətin narazılığı ilə qarşılanır. Onun sözlərinə görə, Bəhreyn xalqı ölkədən ABŞ hərbi qüvvələrinin çıxarılmasını tələb edir.
Ərəb ölkələrində şiə vətəndaşların əsassız həbsləri iddia olunur
İclasın davamında çıxış edən Höccətül-İslam vəl-müslimin Seyid Abbas Şəbbər bildirib ki, Birləşmiş Ərəb Əmirlikləri, Səudiyyə Ərəbistanı, Bəhreyn və Küveyt hakimiyyətləri müxtəlif bəhanələrlə bu ölkələrdə yaşayan şiə vətəndaşları saxlayırlar.
O qeyd edib ki, son günlər və həftələr ərzində regionda baş verən hadisələr fonunda Fars körfəzi ölkələrinin bir neçəsində o cümlədən BƏƏ, Küveyt, Səudiyyə Ərəbistanı və Bəhreyndə çoxsaylı dini, elmi və akademik şəxslər çağırılıb, dindirilib və həbs olunub. Bildirilib ki, bu şəxslərə qarşı konkret ittihamlar irəli sürülməyib.
Höccətül-İslam vəl-müslimin Seyid Abbas Şəbbər əlavə edib ki, BƏƏ-nin dövlət təhlükəsizlik orqanları “vilayəti-fəqih”ə bağlılıq və guya “gizli fəaliyyətlərdə iştirak” kimi ittihamlarla bir sıra şiə vətəndaşları saxlayıb. Bu ittihamların milli birliyi zəiflətmək və ölkədə sabitliyi pozmaq məqsədi ilə “sistemli təxribat planları” ilə əlaqələndirildiyi iddia olunur.
Bəhreyndə minlərlə siyasi məhbusun olduğu bildirilir
Seyid Abbas Şəbbər vurğulayıb ki, bu həbslər ABŞ və İsrailin İrana qarşı hücumları fonunda baş verir və eyni zamanda BƏƏ-də ABŞ maraqlarına qarşı hücumlarla bağlı görüntülərin yayılmasına qadağa qoyulub, bu səbəbdən də bəzi həbslər həyata keçirilib.
O bildirib ki, Əl-Xəlifə rejimi son on ildə minlərlə şiəni öldürüb, siyasi müxalifləri və onların liderlərini həbs edib, bəzi hallarda isə vətəndaşlıqdan məhrum edib. Rəsmi olmayan məlumatlara görə, Bəhreyn həbsxanalarında 5000-dən çox siyasi məhbus var və onların bir qismi ömürlük həbs və ya ölüm cəzasına məhkum edilib.
Əl-Xəlifə hakimiyyəti 2020-ci ilin sentyabrında İsrail dövləti ilə münasibətləri normallaşdırdıqdan sonra şiələrə qarşı təzyiqləri daha da sərtləşdirib.
Höccətül-İslam vəl-müslimin Seyid Abbas Şəbbər qeyd edib ki, Bəhreyn və İsrail münasibətlərinin normallaşması 2020- ci ilin sentyabrından sonra Əl-Xəlifə hakimiyyəti şiələrə qarşı təzyiqləri daha da artırıb və işğal olunmuş ərazilərdə baş verən hadisələrə qarşı etiraz səslərini susdurmağa çalışıb.
O əlavə edib ki, hazırda ABŞ və İsrailin İrana qarşı hərbi əməliyyatları fonunda Bəhreyn şiələri onun sözlərinə görə “tarixin doğru tərəfində” dayanaraq İrana dəstək nümayiş etdirirlər. Bu səbəbdən hakimiyyət ölkə daxilində qorxu mühiti yaradaraq bu cür etirazların qarşısını almağa çalışır.
Xəbərin sonu
Rəyiniz